17 de juny 2012

Era Hèsta d'Aran

Eth 17 de junh era Val d'Aran celèbre era sua hèsta nacionau, era Hèsta d'Aran, damb motiu dera recuperacion des institucions istoriques araneses er an 1991, hèt qu'arreconeishie era personalitat d'aguest país plaçat ath nòrd-oèst deth Pirenèu catalan e que des d'alavetz a un organ de govèrn pròpri, eth Conselh Generau d'Aran. Era jornada, marcadament institucionau, includís ua desfilada des penons portadi pes representants de cada terçon des dera sedença deth Conselh Generau ath santuari de Nòsta Senhora de Mijaran. Ací se hè a meddia un parlament des autoritats e dempús, dances araneses.




En 1834 era reina Isabel II suprimic es institucions tradicionaus araneses, hèt que culminèc damb ua accion de fòrça deth governador reiau, Pascual Madoz, qu'imposèc ara Val d’Aran eth nau regim administratiu generau der Estat. Enquia er an 1990 non se recuperèren es institucions tradicionaus: es terçons, eth Síndic e eth Conselh Generau d'Aran. Era Lei 16/1990, de 13 de junhsèga, sus eth regim especiau dera Val d’Aran, pretenie dar compliment ath manament der Estatut de Catalonha (1979), en tot restablir eth Conselh Generau e eth sindic d’Aran coma principaus institucions dera organizacion administrativa pròpria de la Vau d’Aran. Damb eth restabliment d'aguestes institucions araneses, s'a hèt un acte d'apariament istoric. 

Eth 17 de junh de 1991 se celebrèren es prumères eleccions ath Conselh Generau d'Aran. Cossent damb çò qu'establís er article 11 dera Lei 16/1990, Aran se dividís es sies circonscripcions, que se corresponen damb es sòns terçons istorics. Eth nombre de conselhèrs e conselhères a elegir eth cadun ei eth següent: Pujòlo: dus membres; Arties e Garòs: dus membres; Castièro: quate membres; Marcatosa: un membre; Lairissa: un membre e Quate Lòcs: tres membres.

Aguest an 2012 se celèbren es 21 ans dera recuperacions des institucions araneses, ua hita istorica entath pòble aranés.

BONA HÈSTA D'ARAN TÀ TOTI E TOTES!

Imne oficiau dera Val d'Aran "Montanhes Araneses"

Adaptat, arrevirat e ampliat de Archiu Comarcau dera Val d'Aran.

Cap comentari:

Publica un comentari a l'entrada

Arrebremba-te de méter eth tòn mail se vòs ua responsa.